Um hátíðina

Sjáumst á Menningarnótt 2017!

Menningarnótt er afmælishátíð Reykjavíkurborgar og verður haldin í tuttugasta og annað skipti þann 19. ágúst. Menningarnótt er hátíð sem allir borgarbúar skapa og upplifa saman, úti á torgum og götum miðborgarinnar, í bakgörðum og söfnum, fyrirtækjum og ekki síst í húsunum í bænum.  

Áherslusvæðið í ár er Hlemmur og þar í kring en mikil gróska og uppbygging hefur verið á þessu skemmtilega svæði. Yfirskrift hátíðarinnar er „Gakktu í bæinn!“ sem vísar til þeirrar gömlu og góðu hefðar að bjóða fólk velkomið og gera vel við gesti.

Menningarnótt markar upphaf menningarárs borgarinnar þegar söfn, leikhús, menningarstofnanir og listamenn hefja sína haust- og vetrardagskrá. Markmið hátíðarinnar er að hvetja til menningarþátttöku með því að reiða fram fjölbreytt og ríkulegt framboð af hinum ýmsu viðburðum. Dagskráin er þverskurður af menningar- og listflóru borgarinnar og eru viðburðir hátíðarinnar gestum að kostnaðarlausu og þar með séð til þess að allir gestir geti notið kraftmikils menningarlífs og góðrar samveru.

 

 

 

Ábyrgðaraðili

Höfuðborgarstofa er ábyrgðaraðili að Menningarnótt. Hlutverk hennar er að halda utan um alla almenna skipulagningu og viðburði, standa að útgáfu dagskrár og kynningu á viðburðum hátíðarinnar. Viðburðir Menningarnætur eru skapaðir og framkvæmdir af menningar- og listastofnunum, félagasamtökum, fyrirtækjum, listamönnum og öðru hugmyndaríku fólki í Reykjavík. Fjölmargir aðrir styðja einnig hátíðina með ýmsum hætti og viljum við á Höfuðborgarstofu þakka af heilum hug þeim fjölmörgu sem koma að hátíðinni.

 

Skrá viðburð til þátttöku

Viltu bjóða gestum að ganga í bæinn? Ertu með viðburð og langar að taka þátt? Ertu með stað en vantar áhugaverðan viðburð? Eða ertu kannski bæði með viðburð og stað? 

Ef þig langar að taka þátt í Menningarnótt og ert með hugmynd af skemmtilegum viðburði skráðu þig til þátttöku með að fylla út þátttökuumsókn hér.

Nánari upplýsingar er hægt að nálgast hjá Höfuðborgarstofu í síma 411-6000 eða senda tölvupóst á menningarnott@reykjavik.is